Жокович 70-маротаба "Катта Дубулға" турнирлари 1/8 финалига чиқди. Бу рекорд!

Сербиялик афсона Australian Open турнирининг учинчи даврасида ATP рейтингида 75-поғонада бораётган нидерландиялик Ботик ван де Зандшульпни уч сет натижасига кўра мағлубиятга учратди - 6/3, 6/4, 7/6(4). Теннисчиларнинг ўзаро учинчи учрашувларидан сўнг Новак ҳисобда олдинга чиқди - 2:1.  

Икки соату 46 дақиқа давом этган баҳсда Жокович 11, ван де Зандшульп 15 та эйс зарбасини амалга оширган. Новак Australian Open турнирларидаги иштироки давомида ўзининг 102-ғалабасини нишонлади. Бу кўрсаткич бўйича у швейцариялик афсона Рожер Федерерга тенглашиб олди.

Бундан ташқари, сербиялик теннисчи айнан Рожерга тегишли бўлиб келган яна бир рекордни янгилади. Новак фаолияти давомида 70-маротаба "Катта Дубулға" турнирлари 1/8 финалига чиқди. Энди Австралия Очиқ чемпионатининг 10 карра чемпиони 1/8 финалда америкалик Итан Куинндан устун келган чехиялик Якуб Меньшикка қарши баҳс олиб боради.