Жон Жонс қайтяпти! Унинг Стипе Миочичга қарши жанг санаси маълум

У катта эҳтимол билан 2 июль куни АҚШнинг Лас-Вегас шаҳрида ўтказиладиган UFC 276 турнири доирасида Стипе Миочич билан жанг қилади. Бу маълумотни шахсан UFC президенти Дана Уайт тасдиқлади. Айни пайтда ташкилот Жонс - Миочич жангини ташкил қилиш бўйича ишларни бошлаб юборган. 

Айтилишича, ғолиб UFC оғир вазн тоифасида вақтинчалик чемпион камарини қўлга киритади. Дивизионнинг амалдаги чемпиони Фрэнсис Нганну яқинда тиззасини операция қилдирди ва бунинг натижасида йил охиригача сафдан чиқди. 

Эслатиб ўтамиз, Жон Жонс 2020 йилнинг февралидан бери жанг ўтказмай келяпти. Ўшанда у яримоғир вазн тоифасидаги UFC чемпионлик камарини Доминик Рейесдан муваффақиятли ҳимоя қилган эди. Стипе Миочич эса сўнгги жангини ўтган йилнинг март ойида Фрэнсис Нганнуга қарши ўтказиб, нокаутга учраганди.