Жон Жонс ва Даниэль Кормье ўртасида трилогия ўтказилади

Трилогия Россиянинг PWL лигасида грепплинг бўйича ўтказилади. Бу ҳақда россиялик таниқли промоутер Альфредо Аудиторе хабар берди, у америкаликлар билан "ALF Reality" лойиҳасида бирга ишлаганди.

"Жаҳон миқёсида катта шов-шувга сабаб бўладиган расмий эълон тез орада эълон қилинади. Биз ўзимизнинг PWL лигамизда Жон Жонс ва Даниэль Кормье ўртасида грепплинг бўйича жанг ўтказамиз. Барчангизни кутамиз! Деярли ҳамма нарса ҳал, икки томон ҳам буни тасдиқланган. Келинг, буни амалга оширайлик!", – деди россиялик ижтимоий тармоқларда эълон қилинган видеода.

Маълумот учун, америкалик икки аралаш яккакураш устаси икки бор октагонда тўқнаш келган. 2015 йилда Жонс ҳакамларнинг якдил қарори билан ғалаба қозонган бўлса, 2017 йилда у Кормьени нокаутга учратганди. Бироқ допинг тестидан ўта олмагани сабабли ғалабадан маҳрум бўлган эди.

Ўтган йили Жонс ва Кормье Россиянинг "ALF Reality 3" жанговар шоусининг учинчи мавсумида рақиб жамоаларига мураббийлик қилишган.