Жўрабек, Ҳумоюн ва Шониғмат “Тошкент Челленжер”ида мағлуб бўлишди

Соврин жамғармаси 125 минг долларни ташкил қилувчи ушбу турнирда дунёнинг 20дан зиёд давлатидан кўзга кўринган теннисчилар иштирок этяпти. Чехиялик Иржи Весели турнирнинг биринчи ракеткаси сифатида эътироф этилган.

Бугун асосий тўрнинг илк даврасида уч нафар теннисчимиз кортга чиқди. Афсуски, уларнинг барчаси рейтингда ўзларидан анча юқорида турган ракетка усталарига имкониятни бой беришди.

Жўрабек Каримов Босния ва Герцеговиния вакили Мирза Басичга 4:6, 3:6, Ҳумоюн Султонов ўтган йилги финалчи, словакиялик Лукаш Лацкога 4:6, 3:6, Шониғмат Шофайзиев эса Янник Мертенсга 4:6, 2:6 ҳисобида ютқазиб қўйди.

Эртага Санжар Файзиев россиялик Евгений Донскойга, мусобақанинг амалдаги ғолиби Денис Истомин эса франциялик Глеб Сахаровга қарши кортга чиқади. Тошкент шаҳрида туғилган Сахаров айни пайтда Франция шарафини ҳимоя қиляпти. Глеб дунё рейтингида 273-поғонадан жой олган.