Карантин бўлсада масофа орқали машғулотлар авжида

Хусусан, бошқарма тасарруфидаги Қарши шаҳар олимпия ва миллий спорт турлари бўйича давлат ихтисослаштирилган мактаб-интернати тарбияланувчилари ҳам уй шароитида масофа орқали устозлари кўрсатмаларига амал қилиб, машғулотларга зўр беришган. 

 Мазкур мактаб-интернатида 230 нафар ўғил болалар бўлиб, уларга 9 нафар тренерлар устозлик қилишади. Машғулотларда тобланиб, маҳоратлари ошиб бораётган мактаб-интернати тарбияланувчиларининг қўлга киритаётган натижалари ҳам таҳсинга лойиқ. 

Биргина ўтган 2019 йилги мусобақаларда, халқаро турнирларда кўплаб медаллар қўлга киритилгани бор гап. Мактаб-интернати директори Яҳё Турдимуродовнинг таъкидлашича, жорий йилда ҳам шода-шода медалларни қўлга киритиш ният қилинган. 

Шунингдек, иқтидорли болаларни спортга жалб этиб, катта спорт сари етаклаш бош мақсадлардан саналади. Айни карантин пайти, спортчи-ўқувчилар уйда. Бироқ машғулотлар режага кўра масофа орқали шиддат билан давом этмоқда. Ушбу йилда ҳам миллий ва халқаро мусобақалардан медаллар билан қайтишни кўзлаётгани уларнинг уйда машғулот пайтидаги суратларида ҳам акс этган.

Илҳом РАҲМОНОВ тайёрлади