Карлос Алькарас US Open чемпиони!

Нью-Йорк шаҳрида якунига етган теннис бўйича "Катта Дубулға" туркумига кирувчи АҚШ Очиқ чемпионати финалга қадар дуёнинг иккинчи ракеткаси бўлиб келган Карлос Алькараснинг тарихий ғалабаси билан тугади. 

Испаниялик теннисчи ҳал қилувчи финал баҳсида амалдаги чемпион, узоқ вақт дунёнинг биринчи ракеткаси мақомида бўлиб келган италиялик Янник Синнерни 6/2, 3/6, 6/1, 6/4 ҳисобларида мағлубиятга учратди. Теннисчиларнинг ўзаро учрашувларида Карлос катта фарқ билан олдинда бормоқда - 11:5.  

Икки соату 44 дақиқалик финал учрашуви статистикаси:

Карлос Алькарас — 10 та эйс, қўшхато йўқ, 5 та брейк 

Янник Синнер — 2 та эйс, 4 та қўшхато, 1 та брейк

Алькарас иккинчи бор US Open турнири чемпионига айланди. У 2022 йилда ҳам бош совринни боши узра баланд кўтарган эди. Энди Карлос "Катта Дубулға" турнирларининг 6 карра ғолиби. US Open мусобақасидаги икки ҳафталик меҳнат Алькарасга 5 миллион доллар мукофот пули ҳамда 2000 рейтинг очкосини келтирди. Испаниялик теннисчи ATP рейтинги карвонбошисига ҳам айланиб олди. Синнер эса 2,5 миллион АҚШ доллари ишлаб олди. Рейтингда эса 2-ўринга пастлади.