Карлос Алькараз Майами "Мастерс" турнири ярим финалида!

Жаҳоннинг 16-ракеткаси испаниялик Карлос Алькараз турнирнинг чорак финалида АТР рейтингида 48-ўринни эгаллаб турган сербиялик Миомир Кечмановични 6/7, 6/3, 7/6 ҳисобида мағлуб этди ва "Мастерс"нинг ярим финалига чиқди.

Учрашув 2 соату 26 дақиқа давом этди. Ушбу вақт давомида 18 ёшли Алькараз бешта эйс зарбаини амалга ошириб, уч бор қўшхатога йўл қўйди ва иккита брейк-пойнтдан унумли фойдаланди. 22 ёшли Кечманович эса иккита эйс қайд этиб, тўпни ўйинга киритишда икки марта хато қилди ва битта брейк қайд этди. Бу спортчиларнинг ўзаро биринчи расмий учрашуви эди.

Miami Open турнирининг ярим финалида Алькараз польшалик Хуберт Хуркачга қарши баҳс олиб боради.

Эслатиб ўтамиз, Майами турнирининг умумий соврин жамғармаси 8 миллион 584 минг 55 долларни ташкил этади. Мусобақанинг амалдаги ғолиби айнан Хуберт Хуркач ҳисобланади.