Каспер Рууд ўтган ҳафтадаги финал учун Циципасдан реванш олди

Ҳал қилувчи финал учрашувида дунёнинг олтинчи ва еттинчи ракеткалари - норвегиялик Каспер Рууд ҳамда грециялик Стефанос Циципас ўзаро тўқнаш келишди. Ўтган ҳафта бу икки теннисчи Монте-Карло "Мастерс" турнирининг финалида ҳам тўқнаш келишган ва ўшанда Циципас ғалаба қозонган эди. 

Бу сафар Рууд ўша мағлубият учун реванш олишга муваффақ бўлди. Бир соату 29 дақиқа давом этган финал баҳсида Каспер рақибини 7/5, 6/3 ҳисобида мағлубиятга учратди. Теннисчиларнинг ўзаро учрашувларида норвегиялик ҳисобда олдинга чиқиб олди - 3:2. 

Финал статистикаси:

Каспер Рууд - 2 та эйс, 2 та қўшхато, 3 та брейк 

Стефанос Циципас - 3 та эйс, 3 та қўшхато, 1 та брейк 

Рууд фаолиятидаги 11-совринни қўлга киритди. Барселонадаги муваффақиятли иштирок унга 500 рейтинг очкоси ҳамда 488,390 доллар мукофот пули келтирди. Вице-чемпион Циципас эса 330 очко ва 260,475 доллар пул ишлаб олди.