05 май 10:02
Янгиликлар

Теннис

Каспер Рууд фаолиятидаги илк "Мастерс" чемпионлигини қўлга киритди

Испания пойтахти Мадрид шаҳри мезбонлик қилган "Мастерс" сериясига кирувчи турнир норвегиялик теннисчининг триумфи билан якунига етди.

ATP рейтингида 15-ўринни эгаллаб келган Каспер Рууд ҳал қилувчи финал учрашувида дунёнинг олтинчи ракеткаси, британиялик Жек Дрэйперни 7/5, 3/6, 6/4 ҳисобларида мағлубиятга учратди. Бу теннисчиларнинг ўзаро ўтказган илк учрашуви бўлди.

Икки соату 29 дақиқа давом этган баҳсда Рууд 9, Дрэйпер 6 та эйс зарбасини амалга оширган. Қўшхатолар ғолиб теннисчида икки баробар кўп бўлди - 7 га 3. Брейклар бўйича статистика эса бир хилда бўлди - 3 тадан.

Норвегиялик теннисчи фаолиятидаги 13-совринни қўлга киритди. У фаолиятида илк бор "Мастерс" сериясига кирувчи мусобақа ғолибига айланди. Рууд Мадриддаги муваффақиятли иштирокидан 1000 рейтинг очкоси ҳамда 985,030 евро мукофот пулига эга бўлди. Дрэйпер эса 650 очко ва 523,870 еврога эга чиқди.