Китобда янги ёпиқ сузиш ҳавзаси

Ҳозирда вилоятда 15 дан зиёд йирик сузиш ҳавзаси ишлаб турган бўлса, уларнинг ўндан ортиғи ёпиқ турдаги бассейнлардир. 

Жорий йилда Китоб туманида яна бир ёпиқ сузиш ҳавзаси фойдаланишга топширилди. Йирик спорт мажмуаси таркибида бунёд этилган ҳавзада болажонлар йилнинг тўрт фаслида ҳам сув спорти билан шуғулланиши мумкин.

– Айни пайтда мажмуа мактабимиз ихтиёрига берилган, – дейди туман болалар ва ўсмирлар спорт мактаби директори Нозим Қаюмов. – Иншоот таркибида бассейн, ювиниш, кийиниш, дам олиш, тиббиёт хоналари мавжуд. Сувни тозалаш, иситиш, хона ҳарорати мўътадиллигини сақлаш тизимлари ишлаб турибди. Бундай шароит ўқувчиларимизнинг сув спорти бўйича юксак натижаларни қўлга киритишига замин ҳозирлайди.