"Кличкони мағлуб этганимдан кейин ўлишни хоҳладим" - Тайсон Фьюри

"Мен болалигимда Кличко аллақачон чемпион эди ва доимо: “Бир куни бу йигитни мағлуб этаман”, дердим. Ҳамма устимдан куларди. У 11 йил давомида чемпион бўлган. Чемпионлик жангига эришишим учун уч йил керак бўлди, чунки мени доимо четга суришарди.

Ниҳоят чемпионлик жангига эришганимда, бу худди Эверестга чиқишдек эди. Кейин айтганимдек, ғалаба қозондим. Ва шундан кейин ҳаммаси тугади. Болалигимдан истаган барча нарсамга эришдим. Бу ажойиб ҳис бўлади деб ўйлагандим, аммо орадан бир дақиқа ўтар-ўтмас, ҳаммаси ағдар-тўнтар бўлди.

Рингдан чиқиб, кийиниш хонасига кирганимдан кейинёқ депрессияга тушдим, чунки ҳаётимда энди ҳеч нарса қолмагандек эди. Яшашимнинг асосий сабаби — Кличкони мағлуб этиш — бир зумда йўқолди. Шундан кейин ҳаммаси пастга қараб кетди: кучли депрессия ва доимий тушкунлик. Оғир вазн тоифасида жаҳон чемпиони сифатида ҳамма нарсага эга эдим, аммо барибир депрессияда эдим. Ҳар куни ўлишни хоҳлардим.

Ҳеч ким менга ёрдам бера олмади. Кейин бир куни шундай иш қилдим: тиз чўкиб, Худога ибодат қилдим. Ётоқхонам полида ётиб, йиғлардим. Ўша пайтда вазним 400 фунт (181 кг) эди, боксдан деярли уч йил узоқлашиб қолгандим. Худога: “Мен энди ўзим эплай олмаяпман. Менга ёрдам беришинг керак. Мени боксга қайтар”, дедим.

Менга ўша полда бир умр ётгандек туюлди, аслида эса тахминан 10 дақиқа ўтган экан. Аммо ўрнимдан турганимда, гўё дунёдаги барча оғирлик елкамдан тушгандек ҳис қилдим. Хотиним Пэрисга: “Эртага формамни тиклаш миссиясини бошлаймиз”, деб бақирдим", — деди Фьюри.

Эслатиб ўтамиз, 2015 йил ноябрь ойида Фьюри Кличкони ҳакамларнинг якдил қарори билан мағлуб этган. Шундан сўнг у қарийб уч йил давомида жангларда иштирок этмаган.