Коллинз - Charleston Open чемпиони!

Мусобақа бош соврини америкалик Даниэль Коллинзга насиб этди. Финалгача WTA рейтингида 22-поғонадан жой олган Коллинз бош соврин учун кечган баҳсда дунёнинг 11-ракеткаси, россиялик Дарья Касаткинани ортиқча қийинчиликсиз мағлубиятга учратди - 6/2, 6/1. 

Бу билан Даниэль ўзаро учрашувлардаги ҳисоб мувозанатини ҳам тиклаб қўйди - 2:2. Етмиш олти дақиқа давом этган баҳсда Касаткина 1, Коллинз 2 та эйс зарбасини амалга оширган. Қўшхатолар Дарьяда кўпроқ бўлди - 5 га 2. Америкалик теннис маликаси 4 та брейк қайд этди. 

Credit One Charleston Open турниридаги муваффақиятли иштирок Коллинзга 500 рейтинг очкоси ҳамда 142,000 АҚШ доллари миқдорида мукофот пули тақдим этди. Коллинз кетма-кет иккинчи ҳафта ҳам совринга эга чиқмоқда. Ўтган ҳафта у Майами WTA 1000 тоифасига кирувчи турнирда ҳам чемпион бўлганди. 

Даниэль бугун эълон қилинган янгиланган WTA рейтингида дунёнинг 15-ракеткасига айланди. Коллинз кетма-кет 13 та учрашувда зафар қучди. Касаткина эса аксинча, мавсумдаги учинчи финалида ҳам мағлубиятга учради.