Конституциянинг ягона манбаи ва муаллифи — халқимиз!

Ижтимоий-сиёсий соҳадаги ўзгариш ҳамда янгиланишлар ҳар биримизнинг турмуш тарзимиз, мақсад ва интилишларимиз, ҳатто қарашларимизга ўз таъсирини ўтказади. Худди шундай, “Ўзбекистон Республикасининг Конституциясига ўзгартиш ва қўшимчалар киритиш тўғрисида”ги Конституциявий қонун лойиҳасининг умумхалқ муҳокамасида иштирок этиш фуқароларнинг ўз қонуний ҳуқуқ ва манфаатлари кафолатини мустаҳкамлаш жараёнида бевосита иштирок этиш учун имкон яратмоқда. 

Жойларда ташкил этилаётган “Менинг конституциям” шиори остидаги жамоатчилик муҳокамаси майдонлари аҳолининг кенг қатлами учун айни муддао бўляпти.

Спортни ривожлантириш вазирлигида ҳам Ўзбекистон Республикаси Конституциясига киритилаётган ўзгаришлар муҳокама қилинди. Ташкил этилган онлайн семинарда Спортни ривожлантириш вазирлиги раҳбарияти ва Марказий аппарати ходимлари, Миллий олимпия қўмитаси масъуллари ҳамда “ZООМ” платформаси орқали вазирликнинг ҳудудий бошқармалари, спорт таълими муассасаларининг раҳбарлари ва тизим ташкилотлари мутасаддилари, ўрта ҳисобда 2 минг нафардан ортиқ соҳа ходимлари иштирок этишди.

Тадбирда Ўзбекистон Республикаси Олий Мажлисининг Қонунчилик Палатаси депутати, сенатор Борий Алиханов иштирок этиб, Бош Қомусимизга киритилаётган ўзгартиришлар ва уларнинг жамият ҳаётига таъсири тўғрисида маъруза қилди.

Мазкур семинарда спорт ҳамжамиятининг таклифлари ҳам инобатга олинганлиги ҳамда барча спорт муассасаларида бу каби тарғибот ишлари амалга оширилиши қайд этилди.

Семинарда таъкидланганидек, Конституциявий комиссияга фуқароларимиздан бугунгача жами 65 мингдан зиёд таклифлар келиб тушган. Муҳокамалар жараёни 5-июлгача давом этишини инобатга олсак, бу кўрсаткич янада ортиши табиий. Фуқароларимиз томонидан келиб тушган таклифларнинг аксарияти инсон, унинг ҳаёти ва эркинлиги билан боғлиқ бўлган, шунингдек, эркин ва адолатли фуқаролик жамиятини ривожлантиришга қаратилгани маълум қилинди.

Шунингдек, семинарда аҳолининг Конституциямизга ўзгартириш ва қўшимчалар киритиш бўйича ўз таклифларини монеликсиз юбориши учун барча қулайликлар яратилганлиги ҳам таъкидланди. Бунинг учун “Менинг Конституциям” онлайн платформаси, “Cалл-марказ”, электрон почта, Телеграм махсус боти каби замонавий ахборот коммуникация воситалари фаолияти йўлга қўйилди.

Таъкидлаш лозим, Ўзбекистон Республикаси Конституциясига киритилаётган ўзгаришларга спорт соҳаси вакиллари ҳам ўз таклифларини билдиришмоқда. Зеро, асосий қонунимизда инсон ва унинг ҳаёти, эркинлиги, қадр-қиммати, дахлсиз ҳуқуқлари ва манфаатларини таъминлаш, “Ўзбекистон – ижтимоий давлат” деган тамойилни мустаҳкам қарор топтириш устувор вазифа этиб белгиланган. 

Бу эса Ўзбекистонда эркин ва адолатли фуқаролик жамиятининг ривожланиши, инсонпарвар, демократик ҳуқуқий давлат барпо этишга хизмат қилади.