Крикет федерацияси ногиронлиги бор бўлган ёшлар билан ишлашни бошлади

Хабарингиз бор, ўтган йили Ўзбекистон крикет федерацияси Ўзбекистон Ногиронлар жамияти марказий бошқаруви билан биргаликда мамлакатимизда жисмоний тарбия ва спортни, шу жумладан крикет спорт турини кенг аҳоли қатлами, хусусан, имконияти чекланган инсонлар орасида ҳам оммавийлигини таъминлаш бўйича ўзаро ҳамкорлик меморандумини имзолашган эди. Мазкур ҳамкорлик доирасида крикет федерацияси томонидан янги йилнинг дастлабки кунлариданоқ хайрли ишларни бошлаб юборишди. 

Хусусан, кеча 5 январь куни пойтахтимизнинг Чилонзор туманидаги 66 - сонли имконияти чекланган болалар учун ихтисослаштирилган мактабда крикет федерацияси вакиллари, мураббий ва спортчилари бир гуруҳ ногиронлиги бўлган ёшлар учун дастлабки илк ўқув-машғулотларини ўтказишди.

Крикет федерацияси бош котиби Жаҳонгир Муродов имконияти чекланган ёшларни ҳам крикет спорт турига фаол жалб этиш орқали жамоларни шакллантириш ва  улар ўртасида мусобақалар  ўтказиш тўғрисида таъкидлаб ўтди. Шунингдек, крикет бўйича спортчилар иштирокида крикет қоидаларини тушунтириб, амалда ўйин  орқали бажариб кўрсатишди. Ўқув-машғулотда иштирок этиб жараёнларни кузатган имконияти чекланган ёшлар эса крикет спорт турига қизиқиши ортгани ва машғулотларда иштирок этиш, крикет бўйича жамоалар тузиш истаги борлигини қайта-қайта таъкидлашди. Ўз ўрнида федерацияси вакиллари бунинг учун барча шарт-шароитларни яратиб беришни ўзларининг асосий вазифаси сифатида қабул қилишди.

Илҳом РАҲМОНОВ тайёрлади