17 ноя 16:13
Янгиликлар

Бошқалар

Крикет Қашқадарё ва Самарқандда ҳам ривожлантирилади

Теглар : Крикет

Ўзбекистон Крикет федерацияси ташаббуси ҳамда Ўзбекистон Республикаси спортни ривожлантириш вазирлиги ҳамкорлигида мамлакатимизда крикет спорт турини кенг ривожлантириш, ушбу спорт тури бўйича мутахассисларни тайёрлаш бўйича амалий ишлар бошлаб юборилган.

Икки босқичли мураббийларни (Level-1 Criket Coaching ) тайёрлаш мақсадида ҳамкорликдаги дастлабки ўқув-йиғин ноябрь ойининг биринчи ўн кунлигида Бухоро ва Сурхондарё вилоятларида амалга оширилган бўлса, мазкур ўқув-йиғин 10-12 ноябрь кунлари Қарши шаҳрида давом эттирилди.

Қарши олимпия ва паралимпия спорт турларига тайёрлаш марказида ўтказилган ўқув семинарда вилоятдаги спорт мактабларидан бир гуруҳ мураббийлар иштирок этиб, якунда сертифекатларга эга бўлишди.

Покистонлик олий тоифали крикет мутахассиси Тоҳир Муҳаммад ҳамда ЎКФ раиси Азиз Михлиевлар томонидан шу йўсиндаги ўқув-семинари Самарқанд шаҳрида ҳам жисмоний тарбия ва спорт мураббийлари иштирокида амалга оширилди.

Биринчи босқич мураббийлик курси якунида иштирокчиларга махсус сертификатлар берилди. Ўзбекистон Республикаси спортни ривожлантириш вазирлиги ҳамда Ўзбекистон Крикет федерациясининг тақвим-режасидаги навбатдаги ўқув-семинар 21-23 ноябрь кунлари Фарғона вилоятида ташкил этилади.