16 мар 07:23
Янгиликлар

Спорт курашлари

Курашчиларимизга барча масалани Қозоғистонда ҳал қилиш вазифаси қўйилди

Ўзбекистон Миллий олимпия қўмитаси раҳбарияти терма жамоаларимизнинг йирик мусобақаларга олиб бораётган тайёргарлик режалари билан танишиб чиқишда давом этади.

Кеча спорт курашлари бўйича терма жамоамизнинг ўз олдига қўйган мақсадлари муҳокама марказида бўлди.

ZOOM платформасида бўлиб ўтган учрашувда МОҚ раиси Рустам Шоабдураҳмонов, Спорт яккакурашлари бўйича Республика олий спорт маҳорат мактаби директори Баҳодир Маматназаров, Ўзбекистон спорт курашлари ассоциацияси бош котиби Шуҳрат Мамадалиев, терма жамоа мураббийлари ва шифокори, шунингдек, МОҚ ходимлари иштирок этишди.

Таъкидлаш жоиз, спорт курашлари бўйича терма жамоамизни келаси ойдан масъулиятли стартлар кутиб турибди. Дастлаб апрель ойида Қозоғистоннинг Олма-ота шаҳрида Осиё қитъаси учун, сўнг Болгариянинг София шаҳрида жаҳон миқёсида ўтадиган лицензион турнирлар бор. Учрашувда ушбу мусобақаларга олиб борилаётган тайёргарликка алоҳида аҳамият қаратилди.

“Эпидемиологик вазият кескинлашмоқда. Спортчиларимизни қаттиқ назоратга олинглар. Худо кўрсатмасин, инфекция юқтириб олишса, лицензион мусобақагача тўлиқ тикланишга улгура олмаслигимиз мумкин. Шунингдек, бутун дунёда вазият хавфли тус олмоқда. Шунинг учун, имкон борича Олма-отанинг ўзида барча лицензияларни ҳал қилиб олиш керак. Париж Олимпиадасига ҳам 3 йилдан кўпроқ вақт қолди. Бу муддат ҳам кўз очиб юмгунча етиб келади. Ханчжоу-2022 ва Париж-2024 мусобақаларига тайёргарлик давомида селекция ишлари объектив бўлишини сўраб қоламиз. Захирамизни кучайтириш орқали кучли ички рақобат пайдо қилишимиз керак. Ҳукуматимиз ушбу мусобақаларга ҳозирлик кўришимизни қўллаб-қувватламоқда”, – деди Рустам Шоабдураҳмонов.

Суҳбат давомида мураббийлар штаби Ханчжоу ва Париж мусобақаларига режалар хусусида ҳам тўхталиб ўтишди. Унга кўра, Ильяс Бекбулатов ва Бекзод Абдураҳмоновни ҳам Париж Олимпиадасига тайёрланадиган таркибда кўриш мумкин.

Аҳамиятлиси, режага кўра Бекбулатов -74 кг, Абдураҳмонов эса -86 кг вазн тоифаларига ўтиши кутилмоқда.

МОҚ раиси онлайн учрашувда ассоциация мутасаддиларига спортчиларнинг саломатлигини қаттиқ назоратга олиш, ўқув-машғулот назоратини янада кучайтириш борасида кўрсатмалар бериб ўтди.