Курашни мактаб спорти тизимига интеграция қилиш масалалари муҳокама қилинди

Унда — International School Sport Federation (ISF) Спорт директори Марко Петриc, Халқаро Кураш Ассоциацияси Бош котиби жаноб Реза Нассири ҳамда Ассоциация Маъмурияти раҳбари Мансур Мирзаев иштирок этди.

Учрашув давомида кураш спорт турининг халқаро ривожи, унинг ёшлар спортидаги ўрни ва мактаб спорти тизими билан ҳамкорлик истиқболлари юзасидан батафсил тақдимот ўтказилди. Тақдимотда кураш билан шуғулланувчилар сони, айниқса, Ўзбекистон, Ҳиндистон ва Эрон каби мамлакатларда жуда юқори экани алоҳида қайд этилди. Шунингдек, Ўзбекистонда шаклланган замонавий спорт инфратузилмаси ҳамда кураш мактабининг бой тажрибаси халқаро ҳамкорлик учун муҳим асос бўлиб хизмат қилиши таъкидланди.

Мулоқот давомида Ўзбекистон Республикаси Президенти қарори ижросига ҳам алоҳида эътибор қаратилди. Мазкур Қарорга асосан, кураш спорт турини мамлакатнинг барча умумтаълим мактабларида босқичма-босқич жорий этиш режалаштирилган. Ушбу ташаббус орқали нафақат ёш спортчилар сонини кўпайтириш, балки кураш бўйича малакали ўқитувчи ва мураббийлар корпусини кенгайтириш мақсад қилинган.

Учрашув чоғида жаноб Марко Петриc мактаб спорти тақвимидаги йирик мусобақалар ҳақида ҳам маълумот берди. Жумладан, 2027 йилда U15 ёш тоифасидаги мусобақалар Сербияда, U18 тоифасидаги баҳслар эса Мекcикада ISF World Cup индивидуал спорт турлари дастури доирасида ўтказилиши режалаштирилганини таъкидлади. Шу билан бирга, у Кураш спорт турининг ISF World Combat Games дастури доирасига киритилиши эҳтимолини мамнуният билан қўллаб-қувватлашини билдирди.

Музокаралар якунида IKA томонидан Ўзбекистон Республикаси Спорт вазирлиги билан қўшимча маслаҳатлашувлар ўтказилиши, шундан сўнг ҳамкорликни янги босқичга олиб чиқиш ҳамда аниқ амалий қадамларни белгилаш мақсадида навбатдаги учрашувни ташкил этиш бўйича келишувга эришилди.