Курашнинг 2022 йилги Осиё ўйинлари дастуридан расман ўрин олгани тасдиқланди

Таиланд пойтахти Бангкок шаҳрида бўлиб ўтган Осиё Олимпия Кенгашининг сессиясида Хангжоу-2022даги спорт турлари тасдиқланди. Унга кўра 40 та спорт тури бўйича мусобақалар расман ўтказилади. Жакарта-2018 да спорт турлари сони 42 тани ташкил этган. Спортчилар сони ҳам 11720 дан 10000 нафарга камайиши айтиб ўтилди. 2010 йилги Гуанчжоу ва Инчеон-2014 ўйинларида расман мусобақалар ўтказилиб 2018 да четлаштирилган крикет ҳам 2022 йилги Осиё Ўйинлари дастуридан ўрин эгаллади.

Ноолимпия спорт турлари орасида шахмат, жиужитсу, каббади, кураш, сепак такрав, роликда учиш ва ушу ҳам Ҳангжоу-2022 расмий дастурига киритилди.

Эслатиб ўтамиз, ўтган ҳафта Халқаро Кураш Ассоциацияси президенти Ҳайдар Фармон 2022 ва 2026 йилги Осиё Ўйинларида кураш бўйича беллашувлар жами 17 та вазн тоифасида ўтказилиши ҳақида айтиб ўтганди. 

Таъкидлаш керак, Таиланд пойтахтида ўтган конгрессда Ўзбекистон Миллий Олимпия қўмитаси раиси Умид Аҳмаджонов Осиё Олимпия Кенгаши вице-президенти этиб сайланди.

Ўзбекистон кураш федерацияси матбуот хизмати