Кутилмаган хабар! Дунёнинг биринчи ракеткаси ATP Якуний турнирида қатнашмайди

Бунга испанияликнинг жароҳати сабаб бўлди. Бу ҳақда теннисчининг ўзи хабар берди. Бир кун аввал у Париж "Мастерс" турнирининг чорак финалида Хольгер Рунега қарши кортга чиққан ва қорин мушакларидаги жароҳат сабаб баҳсни якунига етказа олмаган эди.

"МРТ натижалари жароҳат биз ўйлагандан ҳам жиддийроқ эканини кўрсатди. Тикланиш учун олти ҳафта керак бўлади. Афсуски, ATP Якуний турнирида ҳам, "Дэвис Кубоги"да ҳам иштирок эта олмайман. Икки муҳим мусобақани ўтказиб юбориш мен учун жуда оғир. Лекин начора, бу спорт. Қўллаб-қувватлаган барча учун ташаккур", - деди Алькараз.