Makarska Open. Тимофеева икки ғалаба эвазига 1/4 финалга чиқди

Мукофот жамғармаси 115 000 АҚШ долларини ташкил этувчи ушбу мусобақада Ўзбекистоннинг иккинчи ракеткаси Мария Тимофеева ҳам ўз омадини синаб кўряпти. Турнирда еттинчи рақам остида таснифланган вакиламиз икки ғалаба эвазига чорак финал йўлланмасини қўлга киритди.

Мария 1/16 финалда россиялик Эрика Андреевани 6/3, 6/2 ҳисобида мағлубиятга учратган эди. Кеча у 1/8 финалда хорватиялик Леа Бошковичдан ҳам устун келди - 6/4, 6/3. Роппа-роса 80 дақиқа давом этган баҳсда Тимофеева битта эйс зарбасини амалга ошириб, битта қўшхатога йўл қўйди. Бу теннисчиларнинг ўзаро ўтказган иккинчи учрашуви бўлди - 1:1. Икки йил аввал ўтган илк баҳсда Бошкович зафар қучганди.  

Таққослаш учун, Мария Тимофеева айни пайтда WTA рейтингида 118, Андреева 230, Бошкович 420-ўринни эгаллаб турибди. Бугун теннисчимиз 1/4 финалда рейтингнинг 297-поғонасидан жой олган Ясмин Каббайга қарши кортга чиқади. Учрашув бизнинг вақт билан соат 20:30да бошланади.