27 янв 07:32
Янгиликлар

Бокс/ММА

Mangu промоушени қозоғистонлик собиқ UFC жангчиси билан шартнома имзолади + ПОСТЕР

Ўзбекистонда янги ташкил этилган Mangu ММА промоушени яна бир тажрибали аралаш яккакураш устаси эвазига ўз сафини бойитди.

Қозоғистонлик собиқ UFC жангчиси Азат Максум Mangu лигасида фаолиятини давом эттиради.

"MANGU оиласига хуш келибсан, Азат Максум. Янги даража", — дейилади промоушен хабарида.

Маълумот учун, Азат Максум 2023 йил июль ойида 16-0 рекорди билан UFC’даги дебютини ўтказган. Ўшанда у Octagon чемпиони сифатида дунёнинг энг кучли лигаси билан шартнома имзолаган эди. Аммо унинг UFC`даги иштироки омадсиз бўлди. Максум 3 мағлубият ва фақат биттагина ғалаба қайд эта олди. Ягона ғалабасига Тайсон Нэм (2023 йил июль, Лас-Вегасдаги UFC Fight Night) устидан ҳакамларнинг айри қарори билан эришганди. Чарльз Жонсон (2024 йил февраль, UFC Vegas 85), Тагир Уланбеков (2025 йил июнь, Бокудаги UFC Fight Night) ва Митч Рапозо (2025 йил 25 октябрь, Абу-Дабидаги UFC 321)га очколар ҳисобига кўра имконият бой берилган. Максум расман 2025 йил 28 октябрда UFC рўйхатидан чиқарилган эди.

Эслатиб ўтамиз, Mangu лигасининг илк турнири 7 февраль куни Тошкентдаги "Ҳумо Арена" мажмуасида бўлиб ўтади.