Мария Тимофеева бугун Хорватиядаги WTA турнири бош соврини учун кортга чиқади

Мукофот жамғармаси 115 000 АҚШ долларини ташкил этувчи ушбу мусобақада Ўзбекистоннинг иккинчи ракеткаси Мария Тимофеева ҳам иштирок этаётгани ҳақида хабар бергандик.

Вакиламиз 1/2 финалда испаниялик Сара Соррибес-Тормога (WTA-304) қарши кортга чиқди. Икки соату 11 дақиқа давом этган баҳсда Мария 6/2, 7/5 ҳисобида зафар қучди. Бу икки теннисчининг ўзаро ўтказган иккинчи учрашуви бўлди. 2024 йилда бўлиб ўтган илк тўқнашувда испаниялик ракетка устасининг қўли баланд келганди.

Бугун 22 ёшли Мария мусобақа финалида латвиялик 23 ёшли Дарья Семенистаяга қарши кортга чиқади. Тимофеева айни пайтда WTA рейтингида 118-ўринни эгаллаб турибди. Семенистая эса 110-поғонада қайд этилган. Ҳал қилувчи баҳс Тошкент вақти билан соат 23:00 да старт олади.