08 июн 08:14
Янгиликлар

Теннис

Мария Тимофеева — Makarska Open чемпиони!

Хорватиянинг Макарска шаҳри мезбонлик қилган теннис бўйича WTA 125 тоифасига кирувчи "Челленжер" турнири Ўзбекистон вакиласининг ғалабаси билан якунига етди.

Мукофот жамғармаси 115 000 АҚШ долларини ташкил этувчи ушбу мусобақада мамлакатимизнинг иккинчи ракеткаси Мария Тимофеева муваффақиятли қатнашди. Турнирда еттинчи рақам остида таснифланган вакиламиз ҳал қилувчи финал учрашувида рейтингда ўзидан саккиз поғона юқорида турган латвиялик Дарья Семенистаяни ортиқча қийинчиликсиз мағлубиятга учратди - 6/2, 6/3.

Бу теннисчиларнинг ўзаро ўтказган илк учрашуви бўлди. Тўқсон уч дақиқа давом этган финал баҳсида иккала теннис маликаси ҳам эйс зарбаларни амалга ошира билмади. Қўшхатолар бўйича Дарья "устунлик" қилди - 2 га 0. Брейкларда эса Мария 5 га 2 кўринишида устун бўлди.

Шу тариқа, Мария Тимофеева Хорватия турнири чемпионига айланди. Бир ҳафталик муваффақиятли иштирок унга 125 рейтинг очкоси ҳамда 15 500 АҚШ доллари миқдорида мукофот пули келтирди. Семенистая эса 8 400 доллар ҳамда 81 очко ишлаб олди.