Марк ван Боммел Бельгия терма жамоаси бош мураббийи этиб тайинланди

Бу ҳақда Бельгия Қироллик футбол ассоциациясининг расмий сайти хабар берди.

“Бельгия Қироллик футбол ассоциацияси Марк ван Боммел 2026 йил 15 августдан бошлаб “қизил иблислар”нинг янги бош мураббийи этиб тайинланганини мамнуният билан эълон қилади. Марк ван Боммел Бельгия миллий терма жамоасини 2028 йилги Европа чемпионатигача бошқаришни кўзда тутувчи шартномага имзо чекди.

Мураббий сифатида Марк ван Боммел ПСВ, “Вольфсбург” ва “Антверпен” жамоаларини бошқарган. “Антверпен”да у улкан муваффақиятга эришиб, клубни мамлакат ичидаги тарихий “олтин дубл”га етаклаган: 2022/2023 йилги мавсумда Бельгия Про-лигаси ва Бельгия Кубогида зафар қучган”, – дейилади хабарда.

Қайд этилишича, Бельгия терма жамоасининг янги мураббийлар штабидан Будевейн Зенден, Мартен Мартенс ва Рейнир Роббемонд ўрин олади.