Майкл Биспинг: "Том Аспиналл — аралаш яккакурашларнинг Муҳаммад Алиси!"

"Мен ҳамиша Том Аспиналлни қўллаб-қувватлаганман. Ростини айтсам, у Жон Жонсни ютган бўларди. Бу мен ақлбовар қилмас жангчи деб ҳисоблайдиган Жонсга нисбатан ҳурматсизлик эмас. Сирил Ган қизиқарли рақиб, чунки у барча оғир вазнлилар орасида энг атлетик ва эҳтимол ҳаракатланиш бўйича Том билан рақобатлаша оладиган ягона рақибдир. Умуман олганда, у Аспиналлдан ҳам жисмонан кучли ва оёқларида енгил ҳаракат қила олади. Том ҳам баҳайбат ва шу билан бирга оёқларида енгил ҳаракат қилишни билади. Мен ҳар доим уни аралаш яккакурашларнинг Муҳаммад Алиси деб айтаман. Айтиш мумкинки, бу оғир вазндаги Жорж Сен Пьернинг версияси: у курашишни ва бошқа ҳамма нарсани билади... Хуллас, мен бу жангда Том Аспиналлнинг ғалабасига ишонаман", - деди Биспинг Bloody Elbow мухбири билан суҳбатда.

Эслатиб ўтамиз, Том Аспиналл - Сирил Ган жанги 25 октябрь куни Абу-Даби шаҳрида ўтказиладиган UFC 321 турнирининг марказий тўқнашуви бўлади.