Майкл Пейж: "Misfits Boxing`да UFC`даги бутун фаолиятимдагидан кўпроқ пул ишлайман"

Бунинг устига у камроқ жанг ўтказади. UFC сентябрь ойида ҳамюртимиз Нурултон Рўзибоев устидан қозонган ғалабасидан сўнг Пейж билан хайрлашди. Бир нечта промоушенлар билан музокаралар олиб борганидан сўнг, у Misfits Boxing таклифини қабул қилди.

"Мен UFC`дан кетдим ва камроқ вақт ичида кўпроқ, тахминан икки баравар кўпроқ пул ишлайман", — деди Пейж Yahoo нашрига берган интервьюсида, бироқ аниқ суммаларни очиқламади. — "Бу учта жанг учун мўлжалланган шартнома ва шу учта жангга мен UFC`даги бутун шартномам давомида олганимдан кўпроқ пул ишлаб топаман. Бу жуда ёқимли. Фаолиятим давомида кўп меҳнат қилдим ва бунга лойиқман деб ҳисоблайман, шунинг учун ҳозирги мавқеимдан миннатдорман".

Пейж UFC`да 2024 йилда чиқиш қила бошлаган ва олтита жанг ўтказиб, бештасида ғалаба қозонган. Жангчининг сўзларига кўра, UFC раҳбарияти унинг ижодкорлигини чеклаб қўйган ва унга қизиқарлироқ жангларни таклиф қилмаган.

"Менинг назаримда, бу шармандалик. Менимча, UFC жангчилар учун анча кўпроқ иш қилиши мумкин эди", — деб таъкидлади Пейж. — "Қандай бўлмасин, сизга ёқадими ёки йўқми, улар аралаш яккакурашлар (ММА) бўйича энг йирик лига ҳисобланади. Уларни қадрлаш керак, у ерда жуда иқтидорли жангчилар бор".