Миллий курашимиз Циндао ўйинларида!

Мамлакатнинг муҳим транспорт йўллари чорраҳаси айнан Циндаода жойлашган. Шунингдек, ушбу шаҳар Сариқ денгиз бўйидаги йирик портга ҳам эгалик қилади. Циндао жуда кўплаб йирик халқаро спорт мусобақалари, нуфузли ўйинларга кўп бора мезбонлик қилган.

Бундан ташқари шаҳарда ҳар йили анъанавий тарзда “Qingdao martial art Games” комплекс мусобақаси ҳам ўтказилиб келинади. Ўйинлар дастуридан кўплаб олимпия ва ноолимпия спорт турлари ўрин олган. 

Мазкур ўйинларнинг нуфузи баландлигидан унга бўлган қизиқиш йилдан-йилга ортиб бормоқда. Циндао ўйинларида кўплаб Олимпия ўйинлари ғолиблари, жаҳон чемпионлари иштирок этади.

Биз учун аҳамиятлиси шундаки, бу йилги баҳсларда Кураш спорт турининг ҳам тақдимоти ўтказилди. Аренага жам бўлган минглаб томошабинлар, спорт расмийлари иштирок этган ушбу маросимда курашнинг усуллари ва техникалари намойиш этилди.

Хитой Кураш ассоциациясидан олинган маълумотга кўра, 2024 йилги Циндао ўйинлари дастурига миллий қадриятимизнинг бир бўлаги ҳисобланган кураш ҳам расмий спорт сифатида киритилади.

Эслатиб ўтамиз, Хитой Кураш ассоциацияси томонидан февраль ойида хитойлик кураш ҳакамлари учун семинар ташкил этилган эди. Унда 150 нафардан зиёд мутахассислар иштирок этишганди. Семинарни Халқаро кураш ассоциацияси (IKA) Рефери комиссияси аъзоси Чо Нгай Ханг бошқариб борганди.