Monte-Carlo Masters. Новак Жокович бош совринни кўзламоқда

Дунёнинг биринчи ракеткаси Новак Жокович мусобақанинг 1/4 финалчисига айланди. Сербиялик теннисчи учинчи даврада ATP рейтингида 24-поғонадан жой олган италиялик Лоренцо Музеттини мағлубиятга учратди - 7/5, 6/3. Теннисчиларнинг ўзаро учрашувларида Новак олдинда бормоқда - 4:1.

Икки дақиқаси кам икки соат давом этган баҳсда Жокович 3, Музетти 1 та эйс зарбасини амалга оширди. Қўшхатолар Новакда кўпроқ бўлди - 2 га 1. Сербиялик 5, италиялик теннисчи эса 3 та брейкка эришган. Жокович фаолиятида 90-маротаба "Мастерс" турнири 1/4 финалида ўйнайди. Унинг ушбу босқичдаги рақиби австралиялик Алекс Де Минаур бўлади.