Quantbox Chennai Grand Masters 2026. Абдусатторов амалдаги тож соҳиби Гукешга қарши баҳс олиб борди

Мукофот жамғармаси 79 500 АҚШ долларини ташкил этувчи мусобақада Ўзбекистон шарафини гроссмейстеримиз Нодирбек Абдусатторов ҳимоя қилмоқда. Ҳамюртимиз турнирда мағлубиятсиз одимини давом эттирмоқда. 

Абдусатторов 4-турда амалдаги жаҳон тожи соҳиби Гукеш Доммаражуга қарши баҳс олиб борди. Муросасиз кечган партияда азалий рақиблар муроса кўчасини танлашди. Учрашувда дуранг натижа қайд этилди. Бу шахматчиларнинг ўзаро ўтказган 18-учрашуви бўлди. Нодирбек 3, Гукеш 2 та учрашувда ғалабага эришган. Қолган 13 та партияда дуранг натижа қайд этилган. 

Тўртинчи турнинг қолган барча партиялари ҳам дуранг натижа билан якунига етди. Бешинчи тур олдидан турнир жадвалида франциялик Алиреза Фирузжа 3 очко билан якка пешқадамлик қилмоқда. Аржун Эригаиси 2,5 очко билан иккинчи ўринни банд этган бўлса, Ниҳал Сарин, Дмитрий Андрейкин ва Нодирбек Абдусатторов ҳисобида 2 очкодан бор. Гукеш 1,5 очко билан қўшимча кўрсаткичларга кўра сўнгги 8-ўриндан жой олган. 

Бугун 5-турда Нодирбек Абдусатторов қора доналарда ҳиндистонлик Ниҳал Саринга қарши баҳс олиб боради.