МОҚ Муроджон Холмуродовнинг Олимпия ўйинларига лицензия қўлга киритганини тасдиқлади

Яна бир спортчимиз Токио-2020 Олимпиадаси учун лицензия қўлга киритди

Бугун Миллий олимпия қўмитаси ушбу хабарни расман тасдиқлади.

Ноябрь ўзбек спорти учун унутилмас воқеликларга бой бўлмоқда. Боиси, ой давомида пара-атлетларимиз жаҳон чемпионати орқали Токио Паралимпиадасига 8 та, спортимиз тарихида илк бор замонавий бешкурашчиларимиз Олимпия ўйинларига бир эмас, иккита лицензияга эга бўлишди.

Велоспортчимиз Муроджон Холмуродовнинг Токио Олимпиадасига йўлланма олгани ҳақидаги расмий хабар эса бугун барча ўзбек спорти мухлисларини хурсанд қилиши турган гап. Ҳамюртимиз апрель ойида Тошкентда ўтказилган велошоссе бўйича Осиё чемпионатида бешинчи ўринни қўлга киритган эди. Айнан ушбу натижа спортчимиз учун Токио Олимпиадаси эшигини очмоқда. Боиси ундан юқори натижа қайд этган спортчилар жаҳон чемпионати орқали Олимпиада йўлланмасига эга бўлишди. Токио-2020 Холмуродовнинг фаолиятидаги иккинчи Олимпиада бўлади. Ҳамюртимиз аввал 2012 йил Лондон Олимпиадасида ҳам юртимиз шарафини ҳимоя қилган.

Шу тариқа Токио Олимпиадасига қўлга киритилган лицензияларимиз сони 14 тага етди. Ўзбекистон Миллий олимпия қўмитаси Ўзбекистон велосипед спорти федерациясини ушбу спорт турида қўлга киритилган иккинчи йўлланма билан муборакбод этиб, трек йўналишида ҳам Олимпия ўйинлари лицензияси учун кураш олиб бораётган ҳамюртларимизга омад тилаб қолади.