МОҚ Загребда муваффақиятга эришган юнон-рум курашчиларимизни қутлади!

Ўзбекистон Миллий олимпия қўмитаси курашчиларимизни ушбу муваффақиятли иштирок билан табриклади.

"Кураги ерга тегмас курашчиларимиз, Сизлар 16-17 январь кунлари Хорватиянинг Загреб шаҳрида ўтказилган “Zagreb Open” мусобақасида муваффақиятли иштирок этиб, мамлакатимиз спорт салоҳиятини бутун дунёга намойиш этдингиз.

Ортда қолган мураккаб даврда ноқулай шароитда бўлса ҳам бир зум машғулотларни тўхтатмадингиз, ўз олдингизга қўйган улкан мақсад сари дадил қадам қўймоқдасизлар. Хорватия турнирида ўз иродангиз ва матонатингизни намойиш қилиб, 2 та олтин, 1 та кумуш ва 1 та бронза медалларини қўлга киритдингиз.

Ўзбекистон Миллий олимпия қўмитаси Сизларни узоқ муддатли танаффусдан сўнг яна халқаро ареналарда эришган шундай ютуғингиз билан муборакбод этади. Олдиндаги нуфузли мусобақалар, жумладан Токио-2020 Олимпия ўйинларида ҳам ана шундай зафарлар билан халқимиз ва Президентимизни хурсанд қилишингизга тилакдошмиз", дейилади табрикда.