Мураббийлик фаолиятини бошлаган Шарофиддин Лутфуллаев яна бир ёшга улғайди

Шарофиддин полвонлар юрти - Сурхондарё вилоятининг Ангор туманида дунёга келган. У аввалига кураш, кейин эса дзюдо билан шуғуллана бошлаган. Бугунги қаҳрамонимизнинг спортни танлашига меҳрибон онажониси сабаб бўлган. Мураббийи - Бекзод Тўрабоев. Шарофиддиннинг эришган ютуқлари ва бугунги даражасига чиқишида айнан Бекзод аканинг хиссаси катта. 

2019 йилнинг сентябрида Шарофиддин дзюдо ватани Японияда ўтган Жаҳон чемпионатида кумуш медални қўлга киритган. Лутфуллаев айнан ўша мусобақадан сўнг Олимпиада рейтингида биринчи ўринга кўтарилиб олган эди. Шарофиддиннинг ютуқларидан яна бири 2013 йилда Абу-Даби Гран-присига тўғри келади. Ўшанда ёш дзюдочимиз Лондон-2012 Олимпиадаси чемпиони, Россия терма жамоасига 22 йиллик танаффусдан сўнг илк олтин медални тақдим этган Арсен Галстянни мағлуб эта олганди. 

Фурсатдан фойдаланиб, сайтимиз ижодий гуруҳи ҳамда ўқувчилари номидан куни кеча ўзи туғилиб ўсган Сурхондарёда мураббийлик фаолиятини бошлаган "Мард ўғлон" давлат мукофоти соҳиби Шарофиддин Лутфуллаевни бугунги шукрона куни билан муборакбод этамиз. Унга сиҳат-саломатлик, оилавий бахт тилаймиз. Олимпидадаги орзуси рўёбини мураббий сифатида тайёрлайдиган шогирдларида кўриш бахти насиб этсин.