Наманганда шинкиокушинкай каратэ бўйича очиқ чемпионат ўтказилди

"NUR-HAS" каратэ маркази томонидан ташкил этилган мусобақада мезбонлардан ташқари Навоий, Самарқанд, Жиззах вилоятлари ҳамда Тошкент шаҳридан юз нафардан зиёд спортчилар татамига чиқишди. 

Ўз тарихида иккинчи бор ташкил этилган мусобақа Осиё чемпионатига саралаш босқич вазифаси ҳисобланарди. Ушбу қитъа чемпионати 2024 йил сентябрь ойида Таиланд давлатида ўтказилади. Ташкилотчиларнинг хабар беришича, Намангандаги турнир учун спортчилардан бадал пуллари олинмайди. 

Чемпионат якунларига кўра Тошкент шаҳри каратэчилари умумжамоа ҳисобида биринчи ўринни эгаллашди. Мезбонлар иккинчи ўринни банд этишган бўлса, кучли учликка Самарқанд ва Навоий вилояти каратэчилари якун ясашди. Жиззах вилояти жамоаси тўртинчи поғонадан жой олди.