Нигина Абдураимова Дубай турнирида 1/2 финалга чиқди

Мукофот жамғармаси 100 000 АҚШ долларини ташкил этувчи ушбу турнирда ҳамюртимиз Нигина Абдураимова ҳам муваффақиятли одимламоқда. Мамлакатимизнинг биринчи ракеткаси 94 дақиқа давом этган 1/4 финал учрашувида Изабелла Шиниковани 7/6(7), 6/2 ҳисобида таслим этди. 

Эътиборлиси, болгариялик бу теннисчи нимчорак финалда турнирнинг биринчи ракеткаси, WTA рейтингида 124-ўринни эгаллаб турган словакиялик Виктория Хрунчаковани 7/6(5), 1/6, 6/3 ҳисобларида мағлубиятга учратган эди.   

Таққослаш учун, Абдураимова WTA рейтингида 245, Шиникова 290-ўринни банд этган. Бу теннисчиларнинг ўзаро ўтказган илк учрашуви эди. Энди Нигина финал чиптаси учун россиялик Анастасия Тихоновага қарши кортга чиқади. Дунёнинг 216-ракеткаси бўлиб турган Настя 1/4 финалда беларуслик Юлия Гатовкадан 7/5, 4/6, 7/5 ҳисобларидан устун келди.