28 фев 15:31
Янгиликлар

Теннис

Нигина Абдураимова Трнавада 1/8 финалга чиқди

Словакиянинг Трнава шаҳрида теннис бўйича W50 тоифасидаги турнир давом этмоқда.

Хабар берганимиздек, мукофот жамғармаси 50 000 АҚШ долларини ташкил этувчи мусобақада ҳамюртимиз Нигина Абдураимова ҳам иштирок этяпти.

Мамлакатимизнинг биринчи ракеткаси турнирнинг илк даврасида швейцариялик Леони Кангга қарши кортга чиқди. Ҳозиргина якунига етган учрашувда Абдураимова саралаш баҳсларида асосий тўрга йўл олган рақибасини 6/2, 6/3 ҳисобида таслим этди.

Таққослаш учун, Абдураимова WTA рейтингида 247, Канг эса 343-ўринни эгаллаб турибди. Энди теннисчимиз 1/8 финалда Зейнеп Сонмезга қарши баҳс олиб боради. Туркиялик теннисчи илк даврада рейтингда ўзидан 27 поғона юқорида бораётган швейцариялик Лулу Сандан 0/6, 6/4, 6/3 ҳисобларида устун келди. Сонмез дунёнинг 178-ракеткаси бўлиб турибди.