Нукусда белбоғли кураш бўйича ўзбекистон чемпионати беллашувлари ўтказилмоқда

Бугун, 11 декабрь куни  Қорақалпоғистон Республикасининг Нукус шаҳридаги  2 – сонли болалар -ўсмирлар спорт мактабида  белбоғли кураш бўйича 2008-2009 йилларда туғилган ўғил болалар ва қизлар  ўртасида Ўзбекистон чемпионати  беллашувларига старт берилди.

Ўзбекистон Республикаси Туризм ва спорт вазирлиги ҳамда Ўзбекистон белбоғли кураш федерациясининг йиллик-тақвим режасидаги мазкур чемпионат баҳсларида  Қорақалпоғистон Республикаси, Тошкент шаҳри ва барча вилоятлардан  300 нафардан ортиқ   ёш полвонлар иштирок этишмоқда. Ушбу чемпионатда ўғил болалар белбоғли кураш ва эркин йўналишларида 11 та вазн тоифасида ўзаро куч синашишаётган бўлишса, қизлар эркин йўналишда 7 та вазнда ғолиблик учун кураш олиб боришади. Шунингдек, мусобақанинг тантанали очилиш маросими  ҳам ўтказилди. Чемпионат регламентига кўра мусобақанинг биринчи кунида  ўғил болалар белбоғли кураш йўналишида 27, 30, 33, 36, 40, 44, 48, 52, 55, 60, + 60 кг. вазн тоифаларида, қизлар эса эркин йўналишида 33, 36, 40, 44, 48, 52, +52 кг. вазн тоифаларида ғолиблик учун кураш тушишмоқда.

Ўзбекистон чемпионати беллашувлари  13 декабрга қадар давом этади.   

Илҳом РАҲМОНОВ тайёрлади