Нурафшонда спорт тиббиёти тизими ходимлари учун семинар ўтказилди

Дастлаб бошқарма бошлиғи Рустам Бобоқулов сўзга чиқиб, мамлакатимизда спорт тиббиётини ривожлантириш борасида ислоҳотлар амалга оширилаётгани ва шунга мос равишда вилоятдаги спорт-таълим муассасаларда тиббиёт ходимлари фаолиятида янгича тизимида ривожлантириш, эндиликда спорт-тиббиёт ходимларидан машғулотларга илмий асосда ёндашишлари талаб қилинишини таъкидлади. 

Сўнгра Ўрта Чирчиқ тумани спорт мактаби шифокори Обид Ашуров сўзга чиқиб, спорт таълим муассасаларида спорт врачининг иш фаолиятидаги вазифалари, спорт тиббиёти, тиббиётдаги текшириш услублари ҳамда спорт шифокори билиши керак булган қонун-қоидалар бўйича маълумот берди. Шунингдек, "Синафарм" МЧЖ директори Дилбар Атхамбекова томонидан спорт фаолиятидаги метаболик дори воситаларининг ўрни тўғрисида тушунчалар берилди. 

Шундан сўнг, Ўзбекистон Республикаси Вазирлар Маҳкамаси ҳузуридаги Миллий антидопинг агентлигининг Таълим дастурини ишлаб чиқариш бўлими бошлиғи Севара Турсунова ҳамда Терапевтик истиснолар бўлими бошлиғи Фотима Абдураҳимова томонидан допингнинг спортдаги салбий оқибатлари, спортчиларда тақиқланган дори воситалари тўғрисида тўлиқ тушунчалар берилди. 

Семинар сўнгида спорт таълими тиббиёт ходимлари ҳамда тренерлар томонидан спортчиларни юқори натижаларга эришишлари учун қандай витаминлар истеъмол қилиниши, қизлардан иборат спортчиларимиздаги ўзгаришларга қай тарзда илмий жиҳатдан ёндашиш зарурлиги, УЗНАДА қайси вақтда спортчилардан допинг тест олиши ва шунга ўхшаш кўплаб саволларга мутахассислар томонидан тўлиқ жавоб олинди. 

Мазкур спорт тиббиёти бўйича кейинги семинар бир ойдан сўнг Чирчиқ шаҳрида бўлиб ўтиши келишиб олинди.

Илҳом РАҲМОНОВ тайёрлади