Оксана Чусовитина Канадада халқаро мусобақа кумуш медалини қўлга киритди

Оксана Чусовитина спорт гимнастикаси бўйича L’International Gymnix-2017 халқаро мусобақаси совриндори бўлди. 9−12 март кунлари Канаданинг Монреал шаҳрида бўлиб ўтган мусобақада ўзбекистонлик спортчи кумуш медални қўлга киритди.

Етти карра Олимпия ўйинлари иштирокчиси таяниб сакрашда 14,475 натижа қайд этган ҳолда иккинчи бўлди. Кам фарқ — 14,500 билан устунликка эришган канадалик Шэллон Олсен олтин медалга сазовор бўлди. Япониялик Хитоми Хатакеда (14,025) ва канадалик Бруклин Мурс (13,225) бронза мукофотини қўлга киритди.

16−19 март кунлари Оксана Чусовитина аёллар ва эркаклар спорт гимнастикаси бўйича Бокуда (Озарбайжон) ўтказиладиган FIG туркумидаги Жаҳон кубогида иштирок этади.