Олимпиадага тайёрланаётган Ольга Забелинская Туркиядаги мусобақада ғалаба қозонди

Йиғин давомида спортчиларимиз шоссе йўналишида халқаро мусобақада ҳам иштирок этишди.

Туркиянинг Каҳраманмараш шаҳрида 107 км масофага аёллар ўртасидаги пойга ташкил этилди. Унда Ўзбекистон, Туркия, Россия, Қозоғистон ва Украина мамлакатларидан 30 дан ортиқ спортчи иштирок этди.

Қувонарлиси, баҳсларда Ўзбекистон шарафини ҳимоя қилган Ольга Забелинская барча рақибаларидан тезроқ маррага етиб келди ва мусобақа ғолибасига айланди.

Шунингдек, ёш велоспортчимиз Янина Кускова маррага ўнинчи бўлиб етиб келди. Бу ёшлар тоифасидаги энг юқори кўрсаткич бўлди. Шу боис Кускова мусобақанинг «Энг яхши ёш пойгачиси» деб топилди.

Мусобақада қатнашган бошқа велоспортчиларимизнинг натижаси эса қуйидагича кўриниш олди:

София Каримова – 21
Мадина Қаҳҳорова – 24
Анна Куликова – 25
Шаҳноза Абдуллаева – 26

Бундан ташқари, кеча эркаклар ўртасида 167 км масофага (денгиз сатҳидан 4700 метр баландликда) пойга баҳслари ҳам ташкил этилди. Ушбу мусобақада қатнашган йигитларимиздан Алексей Фомовский 22-натижани кўрсатди. Шунингдек, баҳсларда қатнашган Акром Суннатов ва Данил Евдокимов кучли 50 нафар спортчи орасидан ўрин олди. Ушбу мусобақа ёш велоспортчиларимиз учун ўзига хос тажриба вазифасини бажариб берса, Забелинская учун Олимпиада олдидан синов бўлиб хизмат қилди.

Эслатиб ўтамиз, велоспортчиларимизнинг 30 июнь куни бошланган йиғинлари 19 июлда ўз якунига етади.