Олимпиаданинг 9-куни медалсиз якунланди, лекин иккита финалимиз бор

Кун давомида спортчиларимиз қуйидаги натижаларни қайд этишди: 

Узунликка сакраш. Анвар Анваров (Квалификация) - 7,77 метр натижа билан финалга чиқа олмади

Велошоссе. Ольга Забелинская (Гуруҳ пойгаси) - маррага 70-бўлиб етиб келди

Велошоссе. Янина Кускова (Гуруҳ пойгаси) - маррага 51-бўлиб етиб келди

Бокс. Ҳасанбой Дўсматов - Давид де Пина (Кабо Верде) (51 кг, ярим финал) - 5:0 ҳисобида ғалаба қозонди ва финалга йўл олди

Бокс. Лазизбек Мулложонов - Давлат Болтаев (Тожикистон) (92 кг, ярим финал) - 4:1 ҳисобида ғалаба қозонди ва финалга йўл олди

Енгил атлетика. Сафина Садуллаева (баландликка сакраш, финал) - 1,95 метр натижа билан 7-ўринда якунлади.

Ушбу саҳифа орқали ўзбекистонлик спортчиларнинг қайд этаётган натижаларидан хабардор бўлиб туришингиз мумкин бўлди.

САҲИФАНИ ЯНГИЛАШ

23:55. Эхххх... Сафина 1,98 метрни учинчи уринишда ҳам сакрай олмади. Агар шу уддаланганда спортчимиз камида бронзани нақд қилган бўларди... У Олимпиадани 7-ўринда якунлади. У билан бир хил баландликка сакраган, лекин камроқ хато қилган спортчи бронза оладиган бўлди. 

23:48. Иккинчи уриниш ҳам муваффақиятсиз чиқди...

23:43. 1,98 да илк уриниш ўхшамади. Яна иккита имкон бор.

23:36. Сафинада учинчи уриниш ниҳоят ўхшади! 1,95 метр забт этилди!

23:34. Сафинанинг иккинчи уриниши ҳам муваффақиятсиз...

23:31. Сафина 1,95 метрга сакрай олмади. Ҳозирча. Яна иккита имконият бор.

23:20. Садуллаева иккинчи уринишда 1,91 метрни уддалади. Яхши!

23:15. Сафина Садуллаева 1,91 метрга сакрай олмади. Унда ҳали яна иккита имконият бор. 

23:05. Сафина илк чиқишида 1,86 метр баландликка сакрай олди. 

23:00. Сафина Садуллаева ўз чиқишини бошламоқда.

21:50. Велошоссе. Аёллар ўртасидаги гуруҳ пойгасида қатнашган қизларимиз 158 км масофани босиб ўтишди. Янина Кускова 51, Олга Забелинская эса 70-бўлиб маррага етиб келди. 

21:09. Лазизбек Мулложонов ярим финалда (-92 кг) тожикистонлик Давлат Болтаевни 4:1 ҳисобида мағлубиятга учратди ва финалга йўл олди! Ажойиб! Бизда иккинчи финал!

20:14. Ҳасанбой Дўсматов (-51 кг) ярим финалда Кобо-Верде боксчисини 5:0 ҳисобида мағлубиятга учратди ва финалга йўл олди! Профессор ўз услубида!

19:15. Бокс баҳслари ўтказилмоқда. Бироздан сўнг Ҳасанбой Дўсматов финал йўлланмаси учун рингга чиқади. 

17:30. Велоспортчиларимиз Олга Забелинская ҳамда Янина Кускова гуруҳ пойгаси дастуридаги иштирокларини бошлашди. Дастурга кўра, 93 нафар спортчи 158 км масофани босиб ўтишади.

14:51. Анвар Анваров ўзининг учинчи уринишида ҳам 7.77 метр натижа қайд этди ва афсуски, Олимпиададаги иштирокини квалификация босқичида якунлади.

14:30. Анвар Анваров иккинчи уринишда 7.77 метр масофага сакради.

14:22. Узунликка сакраш баҳсларида ҳамюртимиз Анвар Анваров квалификациядаги иштирокини бошлади. У илк уринишида 7.57 метр масофага сакради. Квалификация стандарти 8.15 метр ҳисобланади.