“Олимпия куни” 2.5 миллион ҳамюртимизни бирлаштирди

Аҳамият беринг, Республикамиз тарихида ҳали бундай катта масштабдаги спорт тадбири ўтказилмаган.

Тадбир 6 июль санасига белгиланган бўлса-да, мазкур байрамни нишонлаш Республикамиз вилоятларида бир неча кун муқаддам бошланиб кетган эди. Жумладан, дастлаб Бухоро вилояти Арк қўрғонида “Олимпия куни” доирасида 10 минг киши иштирокида оммавий спорт тадбири ўтказилди.

Шундан сўнг “эстафета таёқчаси” Самарқанд, Хоразм, Андижон, Қашқадарё ва бошқа вилоятларига навбати билан ўтиб борди.

Мазкур спорт тадбири Тошкентдан Термизгача, Хонабод шаҳридан Қорақалпоғистоннинг чекка ҳудудларигача бўлган жойдаги деярли ҳар бир оилага кириб борди. Шу боис ҳам ортда қолган ҳафтани Олимпия ва спорт ҳафталиги сифатида тарихда қолди, дея бемалол айта оламиз. Зеро, бир неча кун мобайнида ҳар бир вилоят, шаҳар ва туман марказларида Олимпизм ғояларини, соғлом турмуш тарзини тарғиб қилиш бўйича катта ҳажмдаги ишлар амалга оширилди. Таъкидлаш жоиз, ушбу тадбир доирасида йирик саноат корхоналаридан тортиб ёзги болалар оромгоҳлари, мамлакатимизда фаолият олиб бораётган кўплаб ташкилотлар ҳам фаол иштирок этишди. Ҳисоб-китобларга кўра, бу йилги “Олимпия куни” бутун Республикамиз бўйлаб 2.5 миллион кишини спорт тарғиботи, Олимпизм ғояси йўлида бирлаштирди.

Жумладан, Тошкентда ўтган оммавий спорт тадбири ҳам пойтахтимиз аҳолиси учун чинакам байрамга айланди. Боғлардаги кўнгилочар тадбирлар, марказий хиёбондаги отлар паради, “Ҳумо арена”даги концерт минглаб ҳамшаҳарларимизга олам-олам қувонч улашди.

6 июль куни “Ҳумо арена”да ўтган катта концерт дастури эса мамлакатимизда ўтган Олимпия ва спорт ҳафталигининг мантиқий якуни бўлди. Ўзбекистон Миллий олимпия қўмитаси бундан кейин ҳам оммавий спорт тарғиботи йўлида қатор спорт тадбирларини ташкил этишда давом этади. Режага кўра, ҳамюртларимиз учун истироҳат боғларида турли мусобақалар, спортимиз юлдузлари иштирокида маҳорат сабоқлари, кўргазмали чиқишлар ташкил қилиш дастурга киритилган.