Олти миллион евро мукофот жамғармасига эга Париж "Мастерс" турнирига қуръа ташланди

Мавсумнинг сўнгги "Мастерс" турнирида дунёнинг энг кучли ракетка усталари бош соврин учун баҳс олиб боради. Қуръа натижасига кўра дунёнинг биринчи ракеткаси, испаниялик Карлос Алькараз иккинчи даврадан иштирокини бошлайди. У россиялик Аслан Карацев ва япониялик Ёсихито Нисиока учрашуви ғолибига қарши кортга чиқади.

Турнирда иккинчи рақам остида таснифланган испаниялик Рафаэль Надаль ҳам иккинчи даврадан баҳсларга қўшилади. Унинг рақиби испаниялик Роберто Баутиста-Агут ёки америкалик Томми Пол бўлади.

Париж "Мастерс"нинг учинчи тартиб рақамли теннисчиси, норвегиялик Каспер Рууд иккинчи даврада франциялик Ришар Гаске (WC, имтиёзли йўлланма) ёки словакиялик Алекс Молчан билан тўқнаш келади. 

Сербиялик Новак Жокович аргентиналик Диего Шварцман ва америкалик Максим Кресси учрашуви ғолибига қарши кортга чиқади. Россиялик Даниил Медведев австралиялик Алекс Де Минаур ва америкалик Себастьян Корда учрашуви ғолиби билан юзма-юз келади. Россиялик яна бир теннисчи Андрей Рублёв иккинчи даврада америкалик Жон Иснер ёки саралаш баҳси ғолибларидан бири билан учрашади.