Осиё чемпионатидаги медаларимиз сони 5 тага етди, лекин ҳали олтин йўқ!

Қитъамизнинг 30 дан ортиқ давлати дзюдочилари иштирок этаётган мусобақада Илиас Илиадис бошчилигидаги Ўзбекистон терма жамоаси ҳам медаллар учун кураш олиб боряпти. Икки кунлик беллашувлар якунига кўра дзюдочиларимиз 5 та медаль қўлга киритишди. Лекин ҳозирча олтин медаль йўқ. Бугун Муроджон Йўлдошев (-73 кг) тиллага жуда яқин келганди. Аммо у дзюдо ватани вакили, япониялик Тацуки Ишиҳарага ютқазиб қўйди. 

Бугунги кун ҳисобидан иккинчи медални Шоҳиста Назарова терма жамоамизга тақдим этди. -70 кг вазндаги дзюдочи қизимиз бронза медали учун кечган баҳсда кореялик рақибасини вазари баҳоси билан таслим этди. Етакчи дзюдочиларимиз Шаҳрам Аҳадов (73 кг), Шарофиддин Болтабоев (-81 кг) ва Гулноза Матниязова (-70 кг) қитъа чемпионатини медалсиз якунлашди. 

Совриндор дзюдочиларимиз:

Кумуш медаль

-73 кг: Муроджон Йўлдошев 

Бронза медаллар

-52 кг: Диёра Келдиёрова 

-60 кг: Достон Рўзиев

-66 кг: Сардор Нуриллаев 

-70 кг: Шоҳиста Назарова 

Эртага асосий умидимиз жаҳон чемпиони Музаффарбек Тўрабоевдан олтин медаль кутамиз. У илк даврадаёқ япониялик дзюдочига қарши татамига чиқади.