Осиё чемпиони Иляс Бекбулатовни табриклаймиз!

Иляс ўзи учун терма жамоа либосидаги илк катта мусобақа - шу йил Ҳиндистонда ўтган Осиё чемпионатида юртимиз шарафини муносиб ҳимоя қилиб, олтин медални қўлга киритганди. У ҳал қилувчи финал беллашувида эронлик полвон Амирҳусайн Али Ҳусайнидан устун келган эди. Бекбулатов Осиё чемпионатида -70 кг вазнда гиламга чиққан. Бу эса Олимпиада вазни ҳисобланмайди. Мураббийларимиз -65 кг вазн тоифасида айнан бугунги кун қаҳрамонини кўришяпти ва курашчимиздан Олимпия ўйинларида ҳам умидлари катта.

"Айни пайтдаги вазним 70 кг, лекин мусобақагача ортиқча 5 килограммдан халос бўлиш мен учун қийинчилик туғдирмайди. Насиб қилса, -65 кг вазндаги Олимпия ўйинларидаги ёқимли анъанани давом эттираман. Бунинг учун биринчи галда Олимпиада йўлланмасини қўлга киритиб олишим керак. Бу вазифани уддалай олишимга ишонаман", - дейди Бекбулатов.

"Шогирдим Илясни бугунги таваллуд куни билан чин юракдан табриклайман. У жуда ҳам истеъдодли курашчи. Ҳозирда карантин қоидаларига амал қилган ҳолда машғулотларни давом эттиряпмиз. Ўйлайманки, у Токио Олимпиадасида Ўзбекистонга олтин медални тақдим этади. Бунинг учун эса аввал олимпия ўйинларига йўлланмани қўлга киритиб олишимиз керак", - дейди Иляснинг мураббийи Али Аҳмедов. 

Фурсатдан фойдаланиб, Ўзбекистон спорт курашлари ассоциацияси раҳбарияти, мураббийлар штаби ҳамда курашчилар номидан мусобақаларга Али Аҳмедов мураббийлигида тайёргарлик кўраётган Иляс Бекбулатовни бугунги таваллуд айёми билан муборакбод этамиз.