Осиё велоспорт конфедерацияси президенти Тошкентдаги қитъа чемпионатига тайёргарлик жараёни билан танишди

Мазкур нуфузли мусобақага тайёргарлик жараёнини кўздан кечириш мақсадида юртимизга Осиё велоспорт конфедерацияси (АСС) президенти Осама Аҳмад Абдулла Ал Шафар, вице-президент Амарджит Сингх, бош котиб Онкара Сингхлар ташриф буюрдилар.

Осама Аҳмад Абдулла Ал Шафар бошчилигидаги делегация 2019 йилнинг 22-28 апрель кунлари Ўзбекистонда бўлиб ўтадиган Осиё чемпионатига олиб борилаётган тайёргарлик, шунингдек, баҳслар ўтказиладиган "йўл харитаси"ни кўздан кечиришди. Бундан ташқари, 2019 йилги Осиё чемпионати ташкилий қўмитаси директори Хофер Роланд ҳамда директор ёрдамчиси Неуманн Андре, Халқаро велосипедчилар иттифоқи вакили (UCI) Фарход Алиев мусобақа бўлиб ўтадиган жойга ташриф буюриб, автомагистрал йўлларнинг ҳолати, меҳмонхоналарни кўришди.

Қайд этиш лозимки, юртимизда илк маротаба ўтказиладиган ушбу Осиё чемпионатида Токио 2020 Олимпиадасига лицензиялар ўйналади. Мусобақада қитъамизнинг 40 га яқин мамлакатидан 600 нафардан зиёд велоспортчи иштирок этиши кутилмоқда. Осиё чемпионати жаҳонга машҳур "Евроспорт" телеканали орқали тўғридан-тўғри трансляция қилиниши ҳам режалаштирилган.

Шунингдек, "Миллий" стадионида Осиё велоспорт конфедерацияси мутасаддилари иштирокида ижроқўм йиғилиши ташкил қилинди. Унда Ўзбекистон велосипед спорти федерацияси бош котиби Козим Ўринбойхўжаев ҳам иштирок этди. Йиғилиш давомида Осиё чемпионатига тайёргарлик даражаси, мусобақа бўлиб ўтадиган автомагистрал йўлларнинг ҳолати, амалга оширилиши лозим бўлган ишлар муҳокама қилиниб, таклифлар берилди.

Бундан ташқари, Осиё велоспорт конфедерацияси (АСС) ҳамда "UzReport TV" телеканали ўртасида Ўзбекистонда ўтказиладиган Осиё чемпионатини ёритиш хуқуқини берувчи келишув имзоланди.