"Ўз вақтида егани ноним бўлмаган". Анвар Бойназаров меҳмонимиз (анонс)

Анвар Бойназаров 1989 йилнинг 10 январь куни Самарқанднинг Жомбой туманида туғилган. 12 ёшидан бошлаб таэквондо билан шуғулланган. У профессионал карьерасини ривожлантириш учун 2008 йил Таиланд пойтахти Бангкокка жўнаб кетди ва даставвал ҳаваскор муайтайчилар ўртасида жаҳон чемпионлигини қўлга киритди.

2011 йилга келиб Бойназаров WMF йўналиши бўйича жаҳон чемпиони бўлди. Икки йилдан кейин бу муваффақиятини такрорлади. Муайтайда унга қадар ўзбекистонлик спортчилар бундай катта муваффақиятга эришмаганди.

Фаолияти давомида Анвар 111 та жанг ўтказиб улгурган. Бу жангларини бор-йўғи 5 йил ичида ўтказиб, ўзига хос рекорд ўрнатган. Айни пайтда тик туриб жанг қилувчи спортчилар учун энг олий бўлган Glory лигасида фаолият кўрсатмоқда. Ўзбекистон ҳаваскор ва профессионал кикбоксинг ассоциацияси маълумотига кўра, Анвар Бойназаров ҳақида Голливуд фильм суратга олишни режалаштирган.

"Persona"да спортчи муваффақиятларига қандай эришгани, бу йўлда нималарни қурбон қилгани ҳақида айтиб берди. У битта жангидан қанча пул топишини, ўзбекистонлик спортчиларга нима етишмаслигини ҳам яшириб ўтирмаган. Қуйида интервьюдан парчалар келтирилди. Тез орада Бойназаров билан суҳбатнинг ўзи тақдим этилади.