31 янв 11:05
Янгиликлар

Бокс/ММА

Ўзбекистон Марказий Осиёда илк бор ММА бўйича жаҳон чемпионатига мезбонлик қилади

Теглар : ММА

Барчага яхши маълум, айни пайтда дунёда жанговар яккакураш спорт турлари орасида ММА (аралаш жанг санъати) шиддат билан ривожланиб, аксарият спорт ишқибозлари диққат эътиборига тушмоқда.

Бугунги кунга келиб Халқаро аралаш жанг санъатлари федерацияси (IMMAF) хаваскор ММА дунёсининг бошқарув ташкилоти бўлиб 123 та аъзо давлатни ўз ичига олади.

IMMAF ва UFC ўртасида тузилган шартномага асосан IMMAF хаваскорлар ўртасидаги мусобақаларда ўзини яхши натижалари билан таниткан спортчилар UFC билан профессионал шартнома тузиш имкониятига эга бўлади.

Кеча, 30 январь куни пойтахтимиздаги "Hilton" меҳмонхонасида Халқаро аралаш жанг санъатлари (IMMAF) федерацияси президенти Керрит Браун, ташкилот бош ижрочи директори Дэнсин Уайт ва Осиё қитъаси директори Виссам Аби Надер иштирокида матбуот анжумани ташкил этилди. Анжуманда шунингдек Ўзбекистон Республикаси Спорт вазири ўринбосари Шаҳрулло Маҳмудов ва МОҚ раиси ўринбосари, Ўзбекистон аралаш жанг санъатлари ассоциацияси раисининг биринчи ўринбосари Шерзод Ташматов ҳам иштирок этди.

Анжуман давомида шу йил октябрь ойида Ўзбекистонда илк бор ММА бўйича ҳаваскорлар ўртасида Жаҳон чемпионати ўтказилиши расман эълон қилинди. Қайд этиш лозимки, бундай мусобақа Марказий Осиёда илк бор ташкил этилади.

Матбуот анжумани мобайнида ОАВ ходимлари ўзларини қизиқтирган саволлар билан мутасаддиларга мурожаат қилишди.