Ўзбекистон қишки спорт турлари ассоциацияси хоҳловчиларни фигурали учиш бўйича ҳакамлик курсларига таклиф этади

Унда Ўзбекистон қишки спорт турлари ассоциацияси сизни ўзаро ҳамкорликка таклиф этади.

Қишки спорт турлари орасида энг жозибалиси бўлмиш фигурали учиш бўйича келажакда ҳакам сифатида фаолият олиб бориш имкониятини қўлдан чиқарманг!

Мамлакатимизда фигурали учиш спортини ривожлантириш мақсадида янги дастур ишлаб чиқилди. Ундан кўзланган мақсад, турли спорт йўналишидаги ҳакамларни фигурали учиш спортига жалб этиш, ўз касбий тажриба ҳамда квалификацияларини оширишдан иборат.

Маълумот учун, фигурали учиш спорти 1908 йилдан бошлаб қишки Олимпия ўйинлари дастурига киритилган. Бу спорт тури бўйича ҳакамлик лицензиясини қўлга киритганлар келажакда Олимпия ўйинлари, Жаҳон ва Европа чемпионатлари, шунингдек, кўплаб халқаро мусобақалар ва қитъа биринчиликларида фаолият олиб боришлари мумкин.

Ўзбекистон қишки спорт турлари ассоциацияси мазкур спорт тури бўйича мутахассис, мураббий ва ҳакамлар, шунингдек, маданият соҳасидаги хореограф, режиссёр ва албатта, фигурали учиш спорти ихлосмандларини кўрик-танловда фаол иштирок этишга чорлайди!

Жорий йил 1 октябрдан 1 ноябрга қадар ҳар бир номзод билан суҳбат ташкиллаштирилади. Шундан сўнг, 1 ноябрдан 1 декабргача тест синовлари ўтказилади.

Шошилинг, имкониятингизни қўлдан бой берманг!

2020 йилнинг 15 декабрь куни экспресс курс ва ёш фигурали учувчилар ўртасида ҳакамлик мусобақалари бўлиб ўтади. Барча ташкилий жараёнлар пойтахтимизнинг “Ace city” мажмуасида бўлиб ўтади.

Батафсил маълумотларни қуйидаги манзилдан олишингиз мумкин: https://wsau.uz/sport_hakamlarini/