Екатерина Гейниш Ўзбекистон терма жамоасини тарк этиб, яна Россия сафига қайтди

Фигурали учишнинг жуфтлик йўналишида Ўзбекистон терма жамоаси аъзоси, қишки Осиё ўйинлари ғолиби Екатерина Гейниш яна Россия сафига қайтганини эълон қилди. Аввалроқ, унинг собиқ шериги Дмитрий Чигирёв оилавий ҳаётга қадам қўйиб, мураббийлик фаолиятини бошлаган эди.

"Баъзан куч тўплаш учун сукут сақлаш керак бўлади. Аммо ҳозир сизлар билан ўй-ҳаёлларимни бўлишишга тайёрман ва буни истайман.

Пайқаган бўлсангиз керак, мен Россия терма жамоасига қайтишга қарор қилдим. Бу қароримда ёрдам бергани ва қўллаб-қувватлагани учун Россия фигурали учиш федерациясига катта раҳмат.

Янги мураббийлар жамоамга — Арина Андреевнага, Сергей Анатольевичга ва улар билан бирга ишлаётган бутун жамоага чин қалбимдан миннатдорлик билдираман. Бу инсонлар ҳар куни мен учун мисли кўрилмаган ишларни қилишмоқда. Сизларга катта раҳмат!

Андрейга алоҳида раҳмат айтмоқчиман. Бирга қандай қийинчиликларни енгиб ўтаётганимизни ва улар бизни қай даражада кучли қилаётганини фақат ўзимиз биламиз. Қисқа вақт ичида улкан ишни амалга оширдик. Иккимиз билан ҳам фахрланаман.

Оиламга, дўстларимга, яқинларимга ва, албатта, мухлисларимга — шу қийин даврда менга ишонганингиз ва қўллаб-қувватлаганингиз учун раҳмат. Таслим бўлмадим, яна муз устига чиқиб, сизларни хурсанд қилиш учун кун сайин меҳнат қилишда давом этдим. Бизни ўлдирмаган нарса бизни янада кучли қилади.

 Энди мени мусобақаларда тез-тез кўрасиз, деб умид қиламан. Яна кўришгунча!", деб ёзган Гейниш ўзининг Telegram'даги каналида.

Эслатиб ўтиш жоиз, Гейниш ва Чигирёв жуфтлиги 2025 йилги Жаҳон чемпионатида Ўзбекистон учун қишки Олимпиада йўлланмасини қўлга киритиб, якунда ушбу йўлланмадан фойдаланишмаган эди.