Ўзбекистон стол тенниси федерацияси вакиллари иштирокида семинар ташкил қилинди

Ўзбекистон Республикаси Президентининг 2017 йил 3 июндаги “Ўзбекистон Республикасида жисмоний тарбия ва оммавий спортни янада ривожлантириш чора-тадбирлари тўғрисида”ги ПҚ-3031-сон қарори билан тасдиқланган “Ўзбекистон Республикасида жисмоний тарбия ва оммавий спортни янада ривожлантириш Дастури”да белгиланган вазифаларнинг ижросини таъминлаш мақсадида бугун, 22 февраль куни Ўзбекистон давлат жисмоний тарбия институти ҳузуридаги Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва уларнинг малакасини ошириш марказида Ўзбекистон стол тенниси федерацияси ижрочи директори Одина Бурхонхўжаева, Ўзбекистон терма жамоаси бош мураббийи Саида Маҳмудова, терма жамоа аъзолари Зоҳид Кенжаев, Римма Гуфранова, Розалина Хожиева ва Ольга Ким, шунингдек Марказ директори Илҳомжон Турсуналиев, кафедра мудирлари, профессор-ўқитувчилар ва тингловчилар ўртасида учрашув ташкил этилди.

Мазкур учрашувда Одина Бурхонхўжаева Ўзбекистон Республикаси Президентининг 2017 йил 9 мартдаги “Ўзбекистон спортчиларини 2020 йилда Токио шаҳрида (Япония) бўлиб ўтадиган ХХХII ёзги Олимпия ва ХVI Паралимпия ўйинларига тайёрлаш тўғрисида”ги ПҚ-2821-сон қарори ижроси юзасидан федерацияда амалга оширилаётган ишлар ҳақида ҳисобот бериб ўтди.

Саида Маҳмудова ихтисослаштирилган болалар-ўсмирлар спорт мактаблари ва болалар-ўсмирлар спорт мактабларидан миллий терма жамоа учун спортчиларни саралаб олиш ва уларнинг халқаро мусобақаларда эришаётган натижалари таҳлили юзасидан қатнашчиларга маълумот берди.

Учрашув иштирокчилари Ўзбекистон стол тенниси федерацияси вакиллари ва миллий терма жамоа аъзоларидан ўзларини қизиқтирган саволларга жавоб олдилар.

Ундан ташқари, Саида Маҳмудова, Римма Гуфранова, Розалина Хожиевалар иштирокида Марказнинг стол тенниси гуруҳи учун маҳорат дарси ташкил этилди. Унда спортчилар учун керакли маслаҳатлар берилди. Техник-тактик ўйинлар, тўп узатишлар ва ўйин давомида бўладиган техник ҳаракатлар намойиш этиб берилди.